ក្រោយមហាជនខ្មែរ ចង់ធ្វើពហិការ មិនមើលរឿងកុនថៃ បែរជាលោកគួច ខេវិន បោះសម្ដីថា បើរបស់យើងល្អ នរណាក៏ចង់មើលដែរ មិនថែមប៉ុណ្ណោះលោកបញ្ជាក់ថា កុំថាឡើយសៀម សូម្បីតែអាមេរិកក៏បុកក្បាលគ្នាទិញដែរ
អតីតអគ្គនាយរងទូរទស្សន៍ លោកគួច ខេវិន ដែលអាចនឹងឈរឈ្មោះជាបេក្ខភាពប្រធានសមាគមសិល្បករខ្មែរ នៅអាណត្តិថ្មីឆ្នាំ២០២៤ នេះ បានចេញសារបង្កប់ ទៅដោយខ្លឹមសារស៊ីជម្រៅ និងដាស់តឿនស្មារតីយុវវ័យ ក្រោយពីមានភាពចម្រូងចម្រាស ពីអ្នកខ្លះព្រមានឈប់ មើលភាពយន្ដថៃ និងប្រើប្រាស់ផលិតផលថៃ តទៅទៀត ក្រោយរឿងម៉ែក្រឡាភ្លើង ផលិតដោយផលិតកម្មសាស្ត្រាហ្វៀម របស់អ្នកស្រីប៊ុន ច័ន្ទនិមល ទៅដាក់បញ្ចាំងនៅថៃ កាលពីប៉ុន្មានថ្ងៃដំបូងនេះ បានរងបរាជ័យទាំងស្រុងតែម្ដង ព្រោះគ្មានអ្នកមើល ទើបធ្វើឲ្យអ្នកគាំទ្រផលិតកម្មមួយនេះ បានព្រមានធ្វើពហិកា លើរឿងថៃ វិញ ដែលនាំឲ្យកំដៅកាន់តែក្ដៅដូចភ្នំភ្លើង។
យ៉ាងណាជុំវិញរឿងរ៉ាវនេះ លោកគួច ខេវិន បានមានប្រសាសន៍ថា បើរបស់យើងល្អ កុំថាឡើយសៀម ទោះជាអាមេរិកក៏បុកក្បាលគ្នាទិញដែរ។
លោកគួច ខេវិន បានថ្លែងសារបន្តទៀតថា លោកឪពុក អ្នកម្តាយខ្ញុំ លោកធ្លាប់ទូន្មានប្រៀនប្រដៅថា ចូរកូនរៀនបើកចិត្តឲ្យទូលាយ មើលឲ្យបានឆ្ងាយ និយាយឲ្យតិចជាងគិត ខ្ញុំព្យាយាមចងចាំ
ក្នុងប៉ុន្មានថ្ងៃនេះ ខ្ញុំបានឃើញនៅលើទំព័រហ្វេសប៊ុក ការបញ្ចេញមតិចំពោះការបាក់ទឹកចិត្ត ត្បិតតែប្រជាជនសៀម មិនចូលទៅមើលកុនខ្មែររឿង ម៉ែក្រឡាភ្លើង ដែលជារឿងកុនបែបខ្មោចលង ស្រដៀងគ្នា ទៅនឹងរឿងខ្មោចនាងនាថ ឬនាងណាត ឯណាឯណីរបស់សៀម ដែលគេមើលឡើងធុញទៅហើយនោះ។
បើនិយាយរឿងកុនសៀម កាលពីទសវត្សរ៍ឆ្នាំ៧០ ហៅថាមហាអន់ តែដើម្បីល្បីគេមកសុំខ្មែរយើងសហការគ្នាថតរឿង ស្នេហាឆ្លងដែន និងរឿងឥន្រ្ទីយ៍ក្រហម ដែលមានតួរខ្មែរសៀមរួមគ្នាសម្តែងដូចជាលោកជា យុទ្ធថន អ្នកស្រីឌី សាវ៉េតលោកសម្បត្តិមេធានី នាងអៈរ៉ាន់យ៉ាណាំវង្ស ហើយប្រជាជនសៀម រាប់ទាំងចៃកុនផង ចូលមើលស្ទើរបាក់រោង នោះគឺសៀមពីមុន តែសៀមឥឡូវខុសពីមុន
ចាប់ពីទសវត្សរ៍ណាណីមក សៀមអត់សង្គ្រាមទេ ចុងទសវត្សរ៍៦០មក ខ្មែរច្បាំងគ្នាជិត ៤០ឆ្នាំទម្រាំមានសន្តិភាព ឥឡូវយើងមានប្រជាជន១៦លាននាក់ ប្រឹងកសាងស្រុកទេស ដោះមីនសឹងមិនទាន់អស់ផង ឯសៀមជិត ៧០លាននាក់ ដើរហួចពេញផ្លូវ ដើរអួតពេញពិភពលោក អួតរាប់ទាំងស្រ្តីតហ្វូតកំប៉ិកកំប៉ុក ចុះយើងវិញ បានអីហៅម៉ូយ ទំនងមានតែស្លាបមាន់ជើងមាន់ប្រហិតស៊ីភី របស់ក្រុមហ៊ុនសៀម បុកល្ហុង ម៉ុកកាថាក់ទឹកកាពិ ដែលមិនមែនជាចំណីខ្មែរហ្នឹងមែន
បើរបស់យើងល្អ នរណាក៏ចង់មើល បើរបស់យើងឆ្ងាញ់ នរណាក៏ចង់ញ៉ាំដែរ មិនខ្វះផ្សារទេ។ ផ្សារសេរីកុំនិយម ពហិកា មិនប្រសើរទេ កុំឲ្យរឿងតូចខូចរឿងធំ ដូចកាលឆ្នាំ២០០៣ រឿងនាងកុបស៊ូវ៉ាណាន់ តោងទាមអង្គរវត្ត កើតរឿងដុតទូតសៀមមួយខ្ទេច
ទំនាក់ទំនងការទូតកម្ពុជា និងសៀម រលាយមួយរយៈ ។ សុំនិទានតាមសាមកុករក្សាព្រៃស្រស់បាន មិនខ្វះអុសដុត សាមកុកសម័យថ្មីឈើមួយដើម ធ្វើឈើគុសបានរាប់លានដើម តែឈើគុសមួយដើមរលាយព្រៃមួយភ្នំ
រៀនមើលគេមើលឯង បើអ្វីមិនល្អបោះវាចោលទៅ តែត្រូវរៀនធ្វើតាមអ្វីដែលល្អ ខំស្លរ ដាំឲ្យរិតតែល្អធ្ វើជារបស់ខ្លួនយើងលក់ ឲ្យគេវិញបើរបស់យើងល្អកុំថាសៀម អាម៉េរិកក៏បុកក្បាលគ្នាទិញដែរ។ កុំតូចចិត្តនាំឲ្យដេកអត់លក់!។
ខុសទាស់អីកុំប្រកាន់ បើកចិត្តឲ្យទូលាយ មើលឲ្យឆ្ងាយ និយាយតិចជាងគិត អរគុណ ។
គូរបញ្ជាក់ថាមុនលោកគួច ខេវិន បញ្ចេញយោបល់ និងលើកពីទស្សនៈមួយចំនួនរបស់លោកពាក់ព័ន្ធគុណភាពវិស័យភាពយន្ដខ្មែរ និងបង្ហាញពីតឹកតាងប្រវត្តិសាស្ត្រពីភាពយន្ដប្រទេសទាំងពីរនោះ នៅលើបណ្ដាញសង្គមមានការជជែកគ្នាកាន់តែច្រើន ពីរឿងនេះពិសេសអ្នកធ្វើការពាក់ព័ន្ធសិល្បៈ ឬវិស័យកុន ។
ប៉ុន្ដែមហាជនមួយចំនួនលើកឡើងថាយោបល់ខ្លះ អាចនឹងឈានទៅជាការញុះញង់កំហឹងប្រជាជាតិ អាចនឹងគ្រោះថ្នាក់ ហេតុនេះទស្សនដ៏ចាក់ដោត របស់លោកខេវិន អាចជាការពិចារណាបាន ៕