យោងតាមនាយកដ្ឋានប្រឆាំងការជួញដូរមនុស្ស និងការពារអនីតិជន បានឱ្យដឹងថា មានករណីជួញដូរសរីរាង្គ គឺតម្រងនោម ឆបោកប្រាក់ នៅមន្ទីរពហុព្យាបាល មេត្រូ អរអិលវី ដែលមានបុគ្គល ង៉ែត សំអូន ជាអគ្គនាយក។ ក្នុងករណីនេះមានជនរងគ្រោះចំនួន ៦នាក់ បានដាក់ពាក្យបណ្តឹងកាលពីថ្ងៃទី១៦ ខែតុលា ឆ្នាំ២០២៣។
នាយកដ្ឋានប្រឆាំងការជួញដូរមនុស្ស និងការពារអនីតិជនបានបញ្ជាក់ថា នៅថ្ងៃទី២១ ខែមករា ឆ្នាំ២០២៤ ដោយមានការបញ្ជាផ្ទាល់ពី លោកស្រី ឧត្តមសេនីយ៍ទោ សុឹម ផាណុំ ប្រធាននាយកដ្ឋាន និងសម្របសម្រួលពីអយ្យការអមសាលាដំបូងរាជធានីភ្នំពេញ បានបង្ក្រាប និងឃាត់ខ្លួនជនប្រព្រឹត្តបទល្មេីស ករណីជួញដូរសរីរាង្គ និងឆបោក នៅឃុំចុងផ្លាស ស្រុកកែវសីមា ខេត្តមណ្ឌលគីរី ដោយមានការសហការល្អ ពីស្នងការដ្ឋាននគរបាលខេត្តមណ្ឌលគិរី។
ក្នុងករណីនេះ នាយកដ្ឋានបានកសាងសំណុំរឿង និងបញ្ជូនជនសង្ស័យទៅសាលាដំបូងរាជធានីភ្នំពេញហើយ។ នៅថ្ងៃទី២៥ ខែមករា ឆ្នាំ២០២៤ តុលាការបានចាត់ការ តាមនីតិវិធី និងចេញដីកា បង្គាប់ឲ្យឃុំខ្លួនបណ្ដោះអាសន្ន នៅមណ្ឌលអប់រំកែប្រែ មរ១។
ពាក់ព័ន្ធករណីនេះ ម្ចាស់មន្ទីរពេទ្យ មេត្រូ អរអិលវី នៅឯក្រៅប្រទេស បានថ្កោលទោសយ៉ាងដាច់អហង្កាចំពោះទង្វើអមនុស្សធម៌ ដែលធ្វើឡើងដោយបុគ្គល ង៉ែត សំអូន ជាមួយប្រជាពលរដ្ឋ ដែលកំពុងរងគ្រោះទាំងអស់។ កន្លងមកមានជនរងគ្រោះ បានធ្វើកិច្ចសន្យា ជាមួយបុគ្គល ង៉ែត សំអូន ក្នុងការបញ្ជូន អ្នកជំងឺទៅព្យាបាល នៅក្នុងប្រទេសឥណ្ឌា ឬឱ្យបុគ្គលនេះ ខ្ចីប្រាក់ ជាថ្នូរនឹងដាក់ទ្រព្យសម្បត្តិរបស់ក្រុមហ៊ុនបញ្ចាំ។
ទន្ទឹមនេះ ម្ចាស់ក្រុមហ៊ុនមន្ទីរពេទ្យ មេត្រូ អរអិលវី ក្រៅប្រទេស កំពុងព្យាយាមកំណត់ទីតាំង និងចំនួនអ្នកជំងឺ ដែលបុគ្គល ង៉ែត សំអូន បានបញ្ជូនមនុស្សទៅកាន់ប្រទេសឥណ្ឌា ដើម្បីព្យាបាលពួកគាត់
សូមរំលឹកថា អ្នកជំងឺតម្រងនោម ឬហៅថាអ្នកជំងឺខូចក្រលៀន មានចំនួន ១៨ នាក់ ដែលបានចាញ់បោក មន្ទីរពេទ្យមេត្រូ អរអិលវី អស់ប្រាក់ក្នុងម្នាក់ម្នាក់ប្រមាណ ៥ ម៉ឺនដុល្លារ ព្រោះបន្ទាប់ពីនាំអ្នកជំងឺប្តូរក្រលៀនទៅដល់ប្រទេសឥណ្ឌា ស្រាប់តែតំណាងមន្ទីរពេទ្យនេះ ដែលប្រមូលលុយពីសាច់ញាតិអ្នកជំងឺបានជិត ១លានដុល្លារអាមេរិក រត់គេចខ្លួនបាត់ ដោយទុកអ្នកជំងឺចោល នៅក្នុងមន្ទីរពេទ្យប្រទេសឥណ្ឌា រាប់ខែ មិនបានផ្តល់សេវាព្យាបាល ប្ដូរក្រលៀននោះទេ។
ជាក់ស្តែង អ្នកជំងឺខូចក្រលៀនម្នាក់ ដែលកំពុងដេករង់ចាំសេវាប្តូរក្រលៀន នៅឯប្រទេសឥណ្ឌា បានប្រាប់សារព័ត៌មានក្នុងស្រុកមួយឲ្យដឹងថា គាត់មានជំងឺខូចតម្រងនោម ហើយបានទាក់ទង រកសេវាព្យាបាលជាមួយមន្ទីរពហុព្យាបាល មេត្រូ អអិលវី ដែលជាតំណាងរបស់មន្ទីរពេទ្យមេត្រូ របស់ប្រទេសឥណ្ឌា កាលពីអំឡុងខែមីនា ឆ្នាំ២០២៣ ហើយដើម្បីទទួលបានសេវាដូរតម្រងនោមនៅប្រទេសឥណ្ឌា រូបគាត់បានបង់ប្រាក់ប្រមាណ ៥ ម៉ឺនដុល្លារអាមេរិក ឱ្យទៅលោក ង៉ែត សំអូន ដែលជាអគ្គនាយកមន្ទីរពហុព្យាបាលមេត្រូ អរអិលវី នៅក្នុងរាជធានីភ្នំពេញ។
តែអ្វីដែលមិននឹកស្មានដល់នោះ គឺបន្ទាប់ពីបានប្រគល់លុយឲ្យ និងត្រូវបាននាំទៅដល់ប្រទេសឥណ្ឌា រូបគាត់បែរជាមិនទទួលបានសេវាដូរតម្រងនោម ដូចអ្វីដែលមន្ទីរពហុព្យាបាលមេត្រូ បានសន្យានោះទេ ដោយ
ទាក់ទងនឹងការរង់ចាំសេវាប្តូរតម្រងនោមនៅប្រទេសឥណ្ឌា អស់រយៈពេល ៧ ខែមកហើយនេះ អ្នកជំងឺរងគ្រោះខាងលើ ក៏បានទម្លាយមូលហេតុ ដ៏គួរឲ្យហួសចិត្តថា គឺដោយសារតែលោក ង៉ែត សំអូន ដែលជាអគ្គនាយកមន្ទីរពហុព្យាបាល មេត្រូ នៅក្នុងរាជធានីភ្នំពេញ មិនបានបង់ប្រាក់ ឱ្យទៅមន្ទីរពេទ្យមេត្រូ នៅក្នុងប្រទេសឥណ្ឌា ខណៈពេលសួរទៅតំណាងមន្ទីរពហុព្យាបាលមេត្រូនៅភ្នំពេញ គេបានអះអាងថា ក្រុមហ៊ុននៅភ្នំពេញក្ស័យធន មិនមានលុយបង់សម្រាប់ការព្យាបាលនេះឡើយ។
តែអ្វីដែលកាន់តែមិននឹកស្មានដល់ទៀតនោះ គឺមានប្រភពព័ត៌មានបានបញ្ចេញឲ្យដឹងថា ពុំមែនមានតែអ្នកជំងឺម្នាក់ខាងលើទេ ដែលរងគ្រោះ គឺនៅមានអ្នកជំងឺជាពលរដ្ឋខ្មែរ រហូតដល់ទៅ ១៧ នាក់ផ្សេងទៀត ក៏ចាញ់បោកដូចគ្នាដែរ ខណៈពួកគាត់កំពុងរង់ចាំទទួលសេវាព្យាបាលដូរតម្រងនោម ដែលបានអូសបន្លាយអស់ជាច្រើនខែមកហើយ ប៉ុន្តែការរង់ចាំហាក់គ្មានពន្លឺអ្វីសោះឡើយ ខណៈលោក ង៉ែត សំអូន ដែលជាអ្នកទទួលលុយនោះ បានគេចខ្លួនបាត់។
រហូតមកដល់ នៅថ្ងៃទី២១ ខែមករា ឆ្នាំ២០២៤ ដោយមានការបញ្ជាផ្ទាល់ពី លោកស្រី ឧត្តមសេនីយ៍ទោ សុឹម ផាណុំ ប្រធាននាយកដ្ឋាន និងសម្របសម្រួលពីអយ្យការអមសាលាដំបូងរាជធានីភ្នំពេញ បានបង្ក្រាប និងឃាត់ខ្លួនជនប្រព្រឹត្តបទល្មេីស ករណីជួញដូរសរីរាង្គ និងឆបោក នៅឃុំចុងផ្លាស ស្រុកកែវសីមា ខេត្តមណ្ឌលគីរី ដោយមានការសហការល្អ ពីស្នងការដ្ឋាននគរបាលខេត្តមណ្ឌលគិរីតែម្តង