ពិតជាកូនកត្តញ៉ូមែន ដល់ខែបុណ្យទាន កូនប្រុសជិះម៉ូតូ បបួលឪពុកទៅវត្ត ដើម្បីលួចម៉ូតូពុទ្ធបរិស័ទ តែចៃដន្យត្រូវតាអាចារ្យ និងព្រះសង្ឃស្រែកផ្អើលឆោឡោ
វាពិតជារឿងដែលគួរអោយហួសចិត្តបំផុត ដែលមហាជនមិនធ្លាប់ឃើញ ខណៈជនសង្ស័យ ២នាក់ឪពុកកូន ដែលជាមុខសញ្ញាលួចកាច់ករម៉ូតូយ៉ាងសកម្ម និងត្រូវបានអ្នកស្រុក ស្គាល់ឈ្មោះយ៉ាងច្បាស់ថា ម្នាក់ត្រូវជាកូនមានឈ្មោះឈឿន ឧត្តម បានធ្វើសកម្មភាពដឹកឪពុកទៅលួចម៉ូតូ ១គ្រឿង នៅក្នុងវត្ត តែត្រូវម្ចាស់ឃើញទាន់ ស្រែកឆោឡោ ផ្អើលដល់ព្រះសង្ឃ តាអាចារ្យ ប្រជាពុទ្ធបរិស័ទ្ធ និងសមត្ថកិច្ច នាំគ្នាដេញតាមចាប់ក្របួចជាប់ទាំង ២នាក់ឪកូន នឹងនាំយកមកចាត់ការតាមច្បាប់តែម្តង។
ករណីកូនដឹកឪពុក ទៅលួចម៉ូតូក្នុងវត្តនេះ បានកើតឡើង កាលពីថ្ងៃទី១៣ ខែតុលា ឆ្នាំ២០២៣ នៅចំណុចបរិវេណ វត្តចំប៉ាចារ្យ ស្ថិតក្នុងឃុំអង្គពរពេល ស្រុកគងពិសី។ ជនសង្ស័យទាំង ២នាក់ឪពុកកូន ដែលត្រូវសមត្ថកិច្ចចាប់ឃាត់ខ្លួននោះ ជនសង្ស័យជាឪពុក មានឈ្មោះ ឈឿន ណាន ហៅចិន អាយុ៥៧ឆ្នាំ មានលំនៅ ភូមិបឹងកក់ សង្កាត់បឹងកក់ ខណ្ឌទួលគោក រាជធានីភ្នំពេញ។
ចំណែកជនសង្ស័យជាកូនប្រុស មានឈ្មោះ ឈឿន ឧត្តម អាយុ១៨ឆ្នាំ មានទីលំនៅក្នុងខណ្ឌពោធិ៍សែនជ័យ រាជធានីភ្នំពេញ។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ ខណៈដែលប្រជាពលរដ្ឋកំពុងនាំគ្នាធ្វើបុណ្យ កាន់បិណ្ឌ នៅក្នុង វត្តចំប៉ាចារ្យ ស្ថិតក្នុងឃុំអង្គពរពេល ស្រុកគងពិសី ស្រាប់តែលេចមុខជនសង្ស័យទាំង២នាក់ ឪពុកកូនខាងលើ ដែលជាមុខ សញ្ញាលួចកាច់សោរករម៉ូតូយ៉ាងសកម្ម បានជិះម៉ូតូ ១គ្រឿង ដឹកគ្នាចូលទៅដល់ក្នុងបរិវេណវត្ត រួចធ្វើសកម្មភាពកាច់សោរករម៉ូតូ ១គ្រឿង ម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ កំពង់ស្ពឺ ១ខ្ជូរ ២៧ ៨៧ បានសម្រេច
រួចក៏ជិះរត់គេចខ្លួន តែភ្លាមភ្លាមនោះត្រូវបាន ម្ចាស់ម៉ូតូប្រទះឃើញទាន់ ស្រែកឆោឡោ ផ្អើលដល់ប្រជាពលរដ្ឋ និងសមត្ថកិច្ច ដេញតាមចាប់អស់រយៈពេលប្រមាណ២០នាទី ទើបកម្លាំងនគរបាល នៃអធិការដ្ឋាននគរបាលស្រុកគងពិសី សហការជាមួយកម្លាំងអធិការដ្ឋាននគរបាលស្រុកកណ្តាលស្ទឹង ខេត្តកណ្ដាល រួមនិងកម្លាំងប្រជាការពារស្ទាក់ចាប់បានជនសង្ស័យទាំង២នាក់ឪពុកកូនបាន ព្រមទាំងដកហូតវត្ថុតាង ម៉ូតូធ្វើសកម្ម ភាព ១គ្រឿង និងម៉ូតូរបស់ជនរងគ្រោះ ១គ្រឿង នឹងបានប្រគល់ជូនជនរងគ្រោះវិញហើយ។
ចំណែកឯជនសង្ស័យទាំង២នាក់ឪពុកកូនខាងលើ ត្រូវ បានសមត្ថកិច្ចជំនាញរៀបចំកសាងសំណុំរឿង បញ្ជូនទៅចាត់ ការបន្តតាមនីតិវិធី ៕
