​ប្រជាពុទ្ធបរិស័ទ ប្រកាសតវ៉ា បើគណៈសង្ឃតែងតាំង ភិក្ខុពេជ្រ ដេវីដ មកគ្រប់គ្រងវត្តក្រុងវុនតាឯក ដែលរដ្ឋាភិបាលបង្កើតថ្មី ព្រោះសង្ឃអង្គនេះ ធ្លាប់ជាប់គុក

ប្រជាពលរដ្ឋ​រស់នៅ​តំបន់​រុន​តា​ឯក បាន​ឲ្យ​ដឹងថា ពួកគាត់​នឹងធ្វើ​ការតវ៉ា ប្រសិនបើ​មានការ​តែងតាំង​ភិក្ខុ ពេជ្រ ដេ​វិដ ជាអៈតីត​គ្រូសូត្រ​នៅ​វត្ត​ពោធិ៍​លង្កា ឱ្យមក​គ្រប់គ្រង​វត្ត​រុន​តា​ឯក​ថ្មី នៅ​ក្រុង​រុនតា​ឯក​ ដែល​រាជរដ្ឋាភិបាល​ទើប​បង្កើតឡើង​នោះ​។

​មូលហេតុ​ដែល ​ ពួកគាត់​មិន​ពេញចិត្ត និង​មិន​គាំទ្រ​​ ប្រសិនបើ​ក្រសួង​ធម្មការ និង​គណៈសង្ឃ​នា យក​ឱ្យ​ភិក្ខុ ពេជ្រ ដេ​វិដ មក​គង់នៅ​វត្ត​រុន​តា​ឯក​ថ្មី ស្ថិតក្នុង​ក្រុង​រុន​តា​ឯក ខេត្តសៀមរាប ព្រោះតែ​ភិក្ខុ​អង្គ​នេះ​កាល​នៅ​ជា​សង្ឃ​ក្នុង​វត្ត​ពោធិ​លង្កា ធ្លាប់បាន​ប្រព្រឹត្ត​ខុស​វិន័យ​សង្ឃ រហូត​ជាប់ពន្ធនាគារ​ថែមទៀតផង។ បើតាម​ប្រជាពលរដ្ឋ​ថា ​ក្រោយ​ចេញពី​​ ពន្ធនាគារ​វិញ ភិក្ខុ ពេជ្រ ដេ​វិដ ក៏បង្ក​រឿង​បែងចែក​ បក្ខពួក​គ្នា រហូត​បិទ​វត្ត​ពោធិ៍​លង្កា​ទាំងស្រុងទៀតផង ​ក្នុង​ខេត្តសៀមរាប ដែល​រឿងនេះ ​អ្នកណា​ក៏​ដឹងដែរ​។​

​សូមបញ្ជាក់ថា​កាលពី​ថ្ងៃទី​២៤ ខែមករា ឆ្នាំ​២០២៤ គណៈសង្ឃ​នាយក បាន​បើក​កិច្ចប្រជុំ​សម្របសម្រួល​មួយ ​ដោយមាន​ការចូលរួម ​ពី​អាជ្ញាធរ គណៈសង្ឃ ព្រមទាំង​តំណាង​ប្រជាពលរដ្ឋ​រុន​តា​ឯក​ផង​លើ​ករណី​យ៍​នេះ ។ តែ​យ៉ាងណាក៏ដោយ​តំណាង​ប្រជាពលរដ្ឋ​រុន​តា​ឯក នៅតែ​បដិសេធ មិន​ព្រម​ទទួលយក​ភិក្ខុ ពេជ្រ ដេ​វិដ ឱ្យមក​គង់នៅ​វត្ត​រុន​តា​ឯក​ថ្មី​ឡើយ ហើយ​ប្រសិនបើ​នៅតែមាន​ការតែងតាំង​ទៀត នោះ​ប្រជាពលរដ្ឋ​ទាំងអស់​នឹង​លើកគ្នា​ធ្វើ​ការតវ៉ា​តែម្តង​។​

​គេ​នៅ​ចាំបាន​ថា នៅក្នុង​លិខិត​មួយ​ចុះ​ថ្ងៃទី​១៣ ខែវិច្ឆិកា ឆ្នាំ​២០២៣ គណៈ​សង្ឃនាយក​បានសម្រេច​បញ្ចប់​មុខតំណែង​ គណៈសង្ឃ​វត្ត​ពោធិ៍​លង្កា ស្ថិត​ក្នុងភូមិ​ស្លរក្រាម សង្កាត់​ស្លរក្រាម ក្រុង​សៀមរាប ខេត្តសៀមរាប ដូច​ខាង ក្រោម ​១​ បញ្ចប់​មុខតំណែង ភិក្ខុ កែវ ខូ​យ ពី​ចៅអធិការ​ ២​ បញ្ចប់​មុខតំណែង ភិក្ខុ ពេជ្រ ដេ​វី​ដ ពី​គ្រូសូត្រស្ដាំ​ ៣​ បញ្ចប់​មុខតំណែង ភិក្ខុ ស៊ី​ញ ស៊ីន ពី​គ្រូសូត្រឆ្វេង និង​៤ បញ្ចប់​មុខតំណែង ភិក្ខុ ពី​វិន័យធម៌។​

សូមបញ្ជាក់ថា ព្រះគ្រូចៅអធិការវត្តពោធិលង្កា ព្រះនាម កែវ ខូយ ត្រូវបានព្រះមេគុណខេត្តសៀមរាប សាលាអនុគុណក្រុង មន្ទីរធម្មការ និងសាសនា ព្រមទាំងមន្ត្រីសង្ឃសម្រេច ផ្អាកតួនាទីពីចៅអធិការវត្ត ក្រោយពីបែកធ្លាយ រឿងលួចទាក់ទងជាមួយស្ត្រីម្នាក់ រហូតឈានដល់តេវិដេអូ សម្រេចមេថុន តាមឆាតហ្វេសប៊ុកទៀតផង

តាមប្រភពព័ត៌មាន បានឲ្យដឹងថា ការផ្អាកតួនាទីរបស់ព្រះចៅអធិការវត្តពោធិ៍លង្កា ធ្វើឡើងនៅថ្ងៃទី១៣ ខែតុលា ឆ្នាំ២០២៣ ដោយមានកម្លាំងសមត្ថកិច្ចចម្រុះ ចុះពង្រឹង សន្តិសុខ សណ្តាប់ធ្នាប់ ផងដែរ។

ពេលនោះ សាលាអនុគុណក្រុងសៀមរាប ក៏បានបញ្ជាក់ថា សាលាអនុគណក្រុងសៀមរាប សូម​ប្រគេន ភិក្ខុ សាមណេរ លោកតា លោកយាយ ឧបាសក ឧបាសិកា ប្អូនប្អូន សិស្ស និស្សិត និងអ្នកដែលកំពុងស្នាក់នៅក្នុងវត្តពោធិលង្កា ស្ថិតនៅក្នុងភូមិស្លរក្រាម សង្កាត់ស្លក្រាម ក្រុងសៀមរាប ខេត្តសៀមរាបទាំងអស់ឱ្យបានជ្រាបថា ​សាលាអនុគណក្រុង សូមធ្វើការប្រកាស រំសាយភិក្ខុ សាមណេរទាំងអស់នៅក្នុងវត្តពោធិលង្កា ឲ្យនិមន្តទៅគង់តាមបណ្តាវត្តក្នុងក្រុងសៀមរាប​ ដែលមានព្រះសង្ឃ សរុបមានចំនួន ១៤០អង្គ និងតាជី យាយជី ក្មេងវត្តមាន ចំនួន ៣១នាក់ ក្នុងនោះ៖ ព្រះសង្ឃជាសមណសិស្សពុទ្ធិកវិទ្យាល័យ រាជបូណ៌ ចំនួន ៣៨អង្គ ត្រូវនិមន្តទៅគង់វត្តរាជបូណ៌វិញ។

ចំណែកព្រះសង្ឃ ចំនួន ១០២អង្គទៀត សូមនិមន្តទំនាក់ទំនងជាមួយសាលាអនុគណក្រុងសៀមរាប ដើម្បីរកវត្តស្នាក់នៅបន្ត។ ដោយឡែក តាជី យាយជី និង ក្មេងវត្ត ចំនួន ៣១ នាក់ ត្រូវធ្វើការទំនាក់ទំនងជាមួយសាលាអនុគណ ក្រុងសៀមរាប ដោយផ្ទាល់នៅវត្តទេពពោធិវង្ស សង្កាត់គោកចក ក្រុងសៀមរាប ខេត្តសៀមរាប ដើម្បីបានវត្តស្នាក់នៅបន្ត។

សាលាអនុគណក្រុង មិនអនុញ្ញាតឲ្យបុគ្គលណាមួយ បន្តស្នាក់នៅក្នុងវត្តពោធិលង្កាទៀតឡើយ។ បើបុគ្គលណាមួយមិនព្រមចាកចេញ តាមការជូនដំណឹងនេះ សាលាអនុគណក្រុង នឹងសហការជាមួយកម្លាំងមាន សមត្ថកិច្ចអនុវត្តតាមផ្លូវច្បាប់ ដោយមិនទទួលខុសត្រូវលើការបាត់បង់ ឬខូចខាតទ្រព្យសម្បត្តិណាមួយឡើយ ។

Leave a Reply

Your email address will not be published. Required fields are marked *