ប្តីដល់ម៉ោងចេញពីធ្វើការ មិនព្រមមកផ្ទះ តេទូរស័ព្ទកុហក់ប្រពន្ធថា ផឹកស៊ីនៅផ្ទះមិត្តភ័ក្ត ប្រពន្ធចាំយូរពេក បីកូនដើររកប្តី ស្រាប់តែតាមទាន់នៅខារ៉ាអូខេកំពុងអោបស្រីស្នេហ៍ ទះបីដៃ រួចដឹកគ្នាមកផ្ទះដេកវិញ
បុរសម្នាក់ចេញពីធ្វើការសំណង់ ក៏ឆ្លៀតលួចចូលខារ៉ាអូខេ លុះប្រពន្ធចាំនៅផ្ទះយូរពេក ក៏បីកូនមករង់ចាំនៅមុខខារ៉ាអូខេតែម្តង ដែលហេតុការណ៍នេះ ធ្វើឱ្យមានការភ្ញាក់ផ្អើលប្រជាពលរដ្ឋពេលពួកគេជួបគ្នាក៏ផ្ទុះជម្លោះប្រាវ កាលពីវេលាម៉ោង១២អធ្រាត្រថ្ងៃទី២ ខែមេសា ឆ្នាំ២០២៤ ស្ថិតនៅខារ៉ាអូខេមួយកន្លែង ស្ថិតនៅសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ។
តាមប្រភពពីស្ត្រីម្នាក់ត្រូវជាប្រពន្ធបុរសខាងលើបាននិយាយប្រាប់ថា ប្តីរបស់គាត់ជាមនុស្សកំពូលខូច ចូលចិត្តដើរលេងផឹកស៊ីសប្បាយ ចោលប្រពន្ធកូនណាស់។ នៅមុនពេលកើតហេតុ ប្តីគាត់ទៅធ្វើការសំណង់ ដល់ម៉ោងមកផ្ទះហើយនៅតែមិនឃើញទៀត គាត់ដែលជាប្រពន្ធ កំពុងអង្គុយទន្ទឹងចាំមើលផ្លូវប្តីអស់ជាច្រើនម៉ោងនៅឯផ្ទះ ក៏បានខលសួរនាំប្តី ហើយគាត់បានឆ្លើយថា កំពុងផឹកស៊ីនៅផ្ទះមិត្តភក្តិ បន្តិចទៀតទៅផ្ទះហើយ។
ការរង់ចាំកាន់តែយូរទៅយូរទៅ ដោយគិតពីសុខសុវត្ថិភាពរបស់ប្តី អត់ទ្រាំមិនបាន ប្រពន្ធក៏សម្រេចចិត្តចេញពីផ្ទះបីកូនដើររកប្តីទាំងកណ្តាលយប់យ៉ាងកណ្តោចកណ្តែង តេក៏មិនចូល ដើររកក៏មិនឃើញ តែទេសកាលអីក៏ប្រទះឃើញម៉ូតូប្តី គាត់ម៉ាកនិច ពណ៌សរ ពាក់ស្លាកលេខពោធិ៍សាត់ ១ជេ ៣៩ ៦០ នៅក្នុងហាងខារ៉ាអូខេមួយកន្លែង ប្តីបារម្ភពីប្តី ប្តូរមកជាខឹងសម្បារជាខ្លាំង គាត់បានដកទូរស័ព្ទខល់ជាច្រើនដង តែមិនចូលសោះ ម្ល៉ោះហើយមានតែឈររង់ចាំប្តីនៅមុខខារ៉ាអូខេតែម្តង រហូតប្តីចេញមកក្រៅ ។
ស្ត្រីជាប្រពន្ធមកចាំប្តីបាននិយាយប្រាប់ទៀតថា គាត់បីកូនមកចាំប្តីគាត់ តាំងពីម៉ោង៨យប់មកម្ល៉េះ ដោយរង់ចាំអស់ជាច្រើនម៉ោង មិនហ៊ានសុំគេចូលទៅខាងក្នុងរកប្តីនោះទេ ។ លុះបន្ទាប់មកឃើញអ្នកសារព័ត៌មានមកថតផ្សព្វផ្សាយច្រើនពេក ខាងសន្តិសុខហាងខារ៉ាអូខេ បានដើរទៅគោះទ្វារហៅប្តីគាត់ដែលកំពុងតែផឹកស៊ី អោបស្រីអូតេសយ៉ាងសប្បាយរីករាយនោះ អោយមកជួបប្រពន្ធនៅខាងក្រៅ
នៅពេលដែលពូសន្តិសុខ ដើរទៅហៅប្តីគាត់ គ្រាន់តែខ្សឹបតិចតិចប្រាប់ថា ប្រពន្ធបងឯងឈរចាំនៅក្រៅខារ៉ាអូខេយូរហើយ ពេលនោះ ប្តីក៏ស្រឡាំងកាំង ទម្លាក់ក្បាលមេក្រូចុះ ហើយប្រញាប់ប្រញាល់ចេញមកក្រៅ មិនលាមិត្តភ័ក្តបន់ភើនសូម្បីមួយម៉ាត់ គ្រាន់តែចេញដល់ខាងក្រៅភ្លាម ស្រាប់តែប្រពន្ធ ទះ៣ដៃរាប់មួយភ្លាមតែម្តង
ស្ត្រីជាប្រពន្ធបានរៀបរាប់ប្រាប់ទាំងកំហឹងថា នៅថ្ងៃមុន ធ្លាប់យកកងដៃគាត់ ទៅលក់យកលុយ ចូលក្លឹបរាំផឹកស៊ីម្តងរួចមកហើយ ដោយគាត់ដាក់ប្តី គាត់ប៉ុន្មានដៃម្តងផងដែរ ដោយប្តីរបស់គាត់សន្យាថា ឈប់ហើយ រាងហើយ លុះក្រោយមកមិនទាន់បានប៉ុន្មានផង ក៏កុហក់លួចចូលខារ៉ាអូខេទៀត ។
ក្រោយពេលកើតហេតុ សន្តិសុខហាងខារ៉ាអូខេហៅបុរសជាប្តីចេញមក ភ្លាមភ្លាមនោះ ប្រពន្ធក៏ដាក់ប្តីត្រូវប៉ុន្មានដៃ បន្ទាប់មក ប្រពន្ធក៏ឌុបប្តី នឹងកូនត្រឡប់ទៅផ្ទះបាត់ទៅ ។